El
Porto de Fiume
di
Rudi Decleva
Quela
volta ero ancora muletto e el nostro Porto el me pareva assai grande, anche
perchè quando me tocava de portarghe el magnar al mio Papà, e lui magari el
lavorava in Riva Rizzo o in Molo
Palermo, non finivo mai de caminar.
El
mio Papà el era del Gruppo Ormeggiatori - che i li ciamava anca "caicianti"
- come saria dir quei che ciapava le zime ai vapori coi caici; era un lavor duro
perche' bisognava esser boni vogadori coi remi de punta su guzzi de otto o più
metri e saper duciar le zime sotto el vapor e portarle in riva contro la bora,
el gelo, la piova non era lavor facile.
Sbagliar
i calcoli e le manovre, podeva dir che la bora la podeva buttar la nave in
Mololongo.
Capo
dei "Ormesadori" era el mio compare Andrea Lini, Papà del mulo Alceo
che adesso el stà a Toronto Ontario, e lavorava anca el Nono dela Medea
Mengotti che la stà a Novara, e el Carlo Plevel, el Hero Onorato - più giovane
de tuti - el Micel Baicich, el Arturo Hirsh, el Bruniza Hrovat, papà del Boris,
e altri che non me ricordo.
Per
questi motivi mi in Porto Franco ero de casa e gavevo el permesso per passar.
Se
entrava dala Sabiza (Piazza Cesare Battisti), dove che era pien de cavai,
cucieri e carri per far i trasporti; in angolo tra la Sabiza e la Riva Filiberto
era un buffet che el era sempre pien de 'sti cucieri e dei servi de piazza e la
gente te magnava 'ste luganighe col kren, picole de tripe, senduich de persuto
bon e i beveva vinazza o birra a spina.
Per
i cavai ghe era tante fontane e per gaver la acqua bastava fracar el tasto de
otton, e i cucieri i impiniva i secci indove che le bestie podeva dissetarse.
Apena
entradi in porto e passada la Capitaneria dove che era el Comandante Brazzoduro,
el Capitano Martich, i piloti Scopaz, Malagia e altri che non ricordo,
se trovava el Molo Ancona, che per lo più el era usado dale nave de
guera e dal "Ipparco Bacich", che el fazeva la linia regolar per Zara
e la Dalmazia e per questo ghe era sempre finanza per paura del contrabando dei
zigaretti e liquori.
Subito
sula man destra vegniva la Riva Duca degli Abruzzi indove che era i depositi
vini de Riboli e là lavorava el Signor Arturo, Papà del Mulo Alfio Mandich,
che gaveva sempre pronta la bozza de vin morlacco per i sui amichi, tra cui el
mio Papà.
Passada
la Riva, se arivava al Molo Genova che el era riservado ale riparazioni navali
da parte dela Ditta Skull; nei ultimi ani de guera me ricordo che el
Cazziatorpediniere "Solferino" el gà passà vari mesi fermo per
lavori.
Dopo
del ribalton del 1943, i Ormesadori i stava de vedetta in testa del Molo e
quando che arivava el idrovolante de Pola o de Venezia i anunciava el
avistamento ala Capitaneria e i sonava una forte sirena per avisar le barche che
le era in meso del porto de liberar la strada al aroplan, che el amarava ala
imboccadura del porto e poi con grande scagaz de motori el se dirigeva al
idroscalo sistemado tra el Molo Scovazza e el Molo San Marco.
El
Idroscalo el era una piataforma de ferro che la funzionava come un sotomarin: se
apriva le valvole, la acqua la entrava e lui se inafondava per ricever el
aroplan; e poi se butava fora la
acqua e lui riemergeva col aroplan ben sistemado de sopra.
Era
propio un bel guardar sta manovra.
Non
me ricordo el nome del mariner, che el portava una bela maja bianca de lana
con le scrite "Ala Littoria", ma lui me fà ricordar el povero
Nando Pravdacich che - quando che era vegnudo el Duce a Fiume arivando propio
con quel aroplan - el gaveva comentado a noi muletti el onor de quel mariner per
gaver streto la man del Duce.
"Ciò
- dizeva el Nando ridendo - nol se
la lavarà più la man!"
Dopo
del Molo Genova, ghe era el Molo Napoli e per arivar là bisognava far tuta la
riva Ammiraglio Thaon de Revel, che la era la più longa de tute e ghe stava
anca tre navi atracade.
Ma
del Molo Napoli parlarò dopo inquanto che vojo solo dir che concludeva la serie
dei Moli del nostro porto el Molo Palermo, costruido dalla Italia e destinado
sopratutto alle banane e là atracava le famose "Ramb", le bananiere
costruide in Cantier da noi per conto dela Regia Amministrazione Monopoli
Banane.
El
Molo Napoli el era un gioiello: gò visitado molti porti nel dopoguera ma
non gò mai visto niente de simile.
Le
grue le cioleva la merce in stiva dela nave e le scarigava dentro al magasin e
el magasin el podeva lavorar sia a levante che a ponente per riscarigar la merce
sui vagoni, e le scine del treno le passava de fianco ai magasini e anca in
testa del molo, con una comodità per la nave unica per quei tempi e i tecnichi
ungaresi, che i lo gaveva progettado, i gaveva dimostrado de esser ben ala
avanguardia.
El
Molo Napoli el gaveva quatro magasini che
i era coverti fra de lori per poder lavorar anca con la piova e le scine le era
sistemade de fora dove che tracava la nave
e dove che caminava le grue, e altre scine le era sistemade fra i magasini, che
così i vagoni podeva vegnir carigadi e scarigadi da dentro del magasin e nel
stesso tempo che la nave la lavorava.
I
vagoni per andar là i vegniva smistadi uno per uno in radice del molo per
mandarli indove che i deveva carigar.
Per
far questa manovra ghe era un scambio, come saria dir un bilico rotondo
girevole indove che el ferovier sistemava el vagon, lo blocava con dei
aresti molto semplici de governar e poi el caval sburtava per far girar el
bilico de 90 gradi.
Mi
gò visto el caval lavorar poi sostituido dai tratori FIAT che i fazeva un
grando scagaz.
El
Molo Napoli era el più moderno e produttivo: non per niente i Drusi dopo la
distruzion dei tedeschi i lo gà agiustà per primo.
Anca
quel gò visto, giorno dopo giorno, fin che xe arivà una nave: i palombari
andava sotto per studiar e per imbragar e cavar i blochi; poi i ficava grossi
pali de legno per ciuder le voragini con le tavole e quindi imbonir con material
e zimento.
Per
ficcar i pali, ghe era un grosso peso, come dir un battente, che se alzava e poi
i lo molava e el palo el entrava sul fango del fondo pochi centimetri per volta,
ma dài oggi e dài domani finalmente el lavor gà avudo fine e quel molo se gà
riparà e el gà podesto ricever la prima nave.
Fazeva
impression veder quel Molo intiero vizin de tuti quei busi fatti dai Gnocchi per
dispetto o forsi per farghe un favor a Trieste.
Con tanti storichi
che gavemo avudo, xè un pecà che nessun se gabi interessado a veder le carte e
capir el perchè de quela scelta nefasta per noi.
Chissà,
se el Porto el fussi restado intiero, forsi che la nostra storia non la se
gavessi cambiada; infati a chi ghe podeva interessar un porto tuto sbregado
gavendo inveze quel de Trieste come novo?
Xè
ancora de dir, che questa volta i Drusi i se gà fato furbi e prima de far
entrar la nave i gà scandaià el fondo per far eliminar le mine magnetiche e
non ripeter la disgrazia che se gaveva verificado qualche mese prima in Porto
Baross.
Me
ricordo come che se fussi adesso: verso le nove de matina - pochi giorni dopo
che erimo stadi "liberadi" dai Druzi - se gà sentido un scoppio che gà
fato tremar tuta la Citavecia.
Un
ponton in Porto Baross el era saltado per aria per colpa de una mina magnetica.
El
Comandante el abitava in Barbacan vizin de mi e me lo ricordo che el caminava
sempre cola bareta de nostromo tuto contento de quel comando.
La
povera moglie, giovane vedova, la se ciamava Nevia e tuta Citavecia la era al
funeral.
El
nostro Porto el era protetto dala Diga Ammiraglio Cagni e la parte terminal, un
trecento metri, la xe stada fatta dalla Italia per proteger el Molo Palermo; la
diga no la era adibida al movimento commerzial e le navi le stava solo in sosta
o in disarmo.
Era
bel per noi far le caminade fino ala Lanterna o far i bagni sulle grotte o in
tel Bagno Quarnero, dove el Signor Koller ne zigava quando che andavimo curiosar
al solarium per veder cossa che fazeva le babe là, così apartade.
Per
andar al Quarnero, se andava a piedi, ma in piena estate - quando che bateva el
sol - se cioleva in Molo San Marco el motoscafo che se ciamava "Meta"
opur se andava sulle passere col tendalin indove che el omo vogava con calma sui
remi e te permeteva de amirar con calma quela nostra paseggiada con la faciada
de Palazzo Adria e l'anfiteatro de Pomerio, Belveder e Cosala.
Quando
che era borin, el Adriano - con la sua bela barca a vela fatta a spigolo - el
fazeva a gara col "Meta" a chi arivava prima e cole sue acrobazie el
rasava i moli e tuti i lo guardava amiradi per la sua bravura.
Adesso in Mololongo non se pol andar più, gnanca a piedi, ma non me interessa perchè quei tempi i xe passadi e cosse ben più tristi le ne xe capitade sulla schena.