MULARIA
Una muleta sporcaciona
se sentava sul múreto.
La spetava el moroseto
per andar a passegiar.
Nini "Gropo" in braghe curte
scalzo e, senza 'na tiraca,
se presenta con 'na fiaca
che te vien da sbadigliar.
La Gioconda con la bile
la ghe ziga dal balcón:
"Lassa star la Rita in paze,
va in malora... mascalzon!"
Ma i muleli i se ne frega
e i va in Crasiza a giogar:
"... ma che more, che violete!
de Madona che scarpete...
Fiori giali, rossi e blu
e... coi chebari de su'."
senza acorgerse i xe entradi
da Giovani 1'ortolan.
Su la chita i xe sentadi,
le zeriese xe un siropo...
ma xe Jakove col s'ciopo
drio la graja ad aspetar.
Quando Rita te lo vede
la ghe peta un soriseto
...el la perdona... ma al muleto
cara la ghe fa pagar!
Mentre Rita magna more,
Nini "Gropo" bagna l'orto!
Giá se vede el mondo storto
de chi deve lavorar....
----------
Chí no xe sta mulo a Fiume, non pol capir zerte robe. Ma chi gá fato in braghe curte e discalzo la gioventú a Cosala o in Belveder, sa de cossa che stemo parlando. Manca la maniza. In qualche posto devo ricordar la maniza.
A Toronto, in Canadá, gavemo una strada che se ciama "Maniza Road". Che sia passado da queste parti el Mario Nafta ?

LE SCALETE DEL CARBONER

Con queste strofe xe nato el titolo:

"Per ricordar le cose che ricordo...".

Le pagine dela mia giovineza le incomincia e le finissi in quel chilometro quadrado che ga per diagonal una riga dal Belveder a Valscurigne-

-------------------------

Dove finiva la via Bonaroti
incominciava quela del Tiziano:

da una e l'altra parte invece,
Salita de l'Aquila i ciamava
quel vicolo coverto de gerina,
dove de inverno i muli se sbregava
el cul de le braghe su la neve,
slitando con careghe vece,
con late ruzini, coverci e doghe
che non vedeva vin da chissá quando...

La riva che portava in suso
partiva da una curta scalinada.
Da sempre el logo era ciamado
"Le Scalete del Carboner" per via
del Frane Frkovic che nel soto-scala
vendeva carburanti de cusina.

Senza un edito scrito in Municipio
la mularia gaveva scelto el posto
per incontrarse a sera e per fis'ciar
dietro le mule che passava in strada.

Quando la bionda Gloria capitava
soto le ociade de la mularía
i fis'ci se sentiva zo in Cantrida
perché la jera un toco de putela
che ancora ogi fa inquietar le idee...

Che tempi bei, passadi ormai...
non sento gnanca piú el gusto
de le zeriese, che andavimo rubar
la vizin... in Seminario.
Chi se ricorda ?

Per questo che mi scrivo questa roba,
per ricordar le cose che ricordo,
per non dimenticar la mularia,
la Gloria, la riveta
e le scalete del Frane carboner.

Un giorno, (me ricordo adesso ben)
i ga ciapado el Frane che lavava
carbon e legni per farli piú pesanti.

Quando che el tubo l'ha becà sul fato
el Frkovic se ga scusà disendo:

"Ma mi solo li lavavo, i xe sporchi
...l'igiene sopratuto !
almeno cosí i me ga deto
quando che go ciapado la licenza... "

************************************************************

EL SECIO COL BUSO

In Zabiza, davanti ai Capuccini,
jera 'na stala... aperta... per cavai
e i cari che spetava d'esser presi
al giorno, setimana o per contrato:
jera per noi muleti 'na cucagna
ma per l'Ossoinack 'na gran disperazion.

Prima de 'ndar far dani in Punto Franco
in Zabiza giogavimo tra i cari
sporcandose de smir tute le maní
le braghe, la camisa e i zinocion.

Mía madre, quando che tornavo a casa,
col palentar la me meteva a posto:

"Ah maledeto mulo, mi scometo
che in Zabiza tra i cari ti giogavi !
invece de portarme qua el ludame
ti se ga fato nero per far dani...
ciol la paleta, el secio e torna indrio
e portime el ludame pel giardin..."

Per ludamar la tera ne ocoreva
due seci de robaza ogni sei mesi,
ma spesso e volentieri me tocava
seguir el ragionar de la mia mama:
pareva che gavessimo campagna !
invece de sei metri de ortizin...

Cossa credé che 'l mal piú grande jera
de seminar ludame su la tera ?
opur de farme veder zo per strada
da le mule col secio e scovazera ?

Jera la strada, jera, altro che scorno !
da Valscurigne in Zabiza e ritorno.

Zo, per el Monte che i ciamava "Gua",
(per via de le copiete a tarda sera),
Rastocine, Potok, zo fino in Braida
per le stradele picie me scondevo
perché la dignitá del "capo-banda"
non se distruge con un secio o col paiol...

Al Cinema Parigi me fermavo
per dar n'ociada a le figurine
e sospirar de invidia per el mulo
che lavorava là strazar biglieti:
che posto de lavoro, che fortuna...
era come se el fossi su la luna !

Per ingrumar la roba era un minuto,
però la mularia non me vedeva
perché se da lontan vedevo uno
lassavo secio e pala e indiferente
fazevo finta de non saver gnente:
jera un afronto, jera, ma ? scherzemo ?

La strada del ritorno era anche pegia
per vía del secio pien che me pesava:
coprivo la robaza con le foje
però la spuza no, non se copriva
anche per via del secio che pus'ciava
lassando drio de mi 'na tanfanada...

Un giorno el tubo Jardas m'ha fermá:

"La senta signor vigile - ghe digo -
se la me multa, la me fa un piazer...!"

"Come ti chiami?" me fa el ghilo nero
"Son fiol de Gíovanin-de-la-lanterna"

"Be' per stavolta lassemo perder...
...ma se ti porti ancora sta robaza
portila suta ! opur ripara el secio !"

Gnanca la lege jera da la mia parte...
coss'ti vol far ? tirarghe con la fionda ?

Ciapa su el secio, Nini spuzolente,
e porta el tuo ludame in Belveder...

10 setiembre 1969

--------------------------------------------------------

Roba vera, con tanto de certificato autenticado dall'Avv. Gherbaz. Che spuza fioi mii. Che spuza. Me la sento ancora soto el naso e me fa rider al pensar che un giorno mía madre ga deto: "Va butar in cava le scovaze ma non butar vía el secio...".

Ocore che ve digo che anca el secio xe svolà in cava sopra a la mularia che scavava per zercar vermi per andar a pescar ?