Parlando de piati tradizionali, ve raconto un fato che me xe restá in mente. Se trata dela visita del zio Pepi del Canadá, che xe venú visitarne per Carneval.
El ga deto giá in telefono che ghe prontemo qualcosa de tradizional fiuman.
El zio Pepi, xe un vecio amico del mio nono e da tuti noi el ne xe molto caro, cosí che volevimo far bela figura. Peró in nesun modo non se potevimo meter d'acordo cosa ghe faremo per pranzo. Ogni d'un gaveva un'altra idea.
La nona Rosa brostulava el café sul brostulin e assieme con la zia Francika che la fazeva le "landize" per cena, le diseva che xe meio de tuto cusinar un bon brodo de galo con carne lesa e blitva in salata con la zivola. El papá diseva che da lui ghe xe meio de tuto la minestra de versa con dentro spala de agnel suto.
El nono tociava el biscoto nel café "difka" che sempre sta sul sparket, e fazeva el solitario. El ga deto che cosa ciacolemo tanto, che meio de tuto xe "cento in boca" o brodeto de rasa, con polenta "cumpiriza" e una bela salata de motoloviza. Dopo che ghe fazemo palacinke con la marmelata de susini.
No, ga deto la mama, semo in Carneval e faremo qualcosa che se magna a Carneval. E la ga meso moiar i fasoi. El papá ga zucá fora del secio i capuzi garbi, che li fa lui in casa.
Mi invece piú de tuto me piase i gnochi dela nona. Come la nona non li fa nisun. Ma non go deto niente.
Finalmente xe arivá sto zio Pepi con la famiglia. La zia Jane e el fio. Sto fio era alto, magro e con i ociai. La zia un pò grasa, ma con un gran soriso. Tuto iera pien de "Hallo" e tanti basi e abraci. Mi, più de tuto me interesava i regali.
Quel giorno semo andà in Corso a guardar el Carneval. Le maschere le iera "de tuti i colori". Iera proprio bel, solo che fori fazeva un fredo can e sufiava una bora de quele che se gavemo tuti iazà. Quando semo tornà a casa, tuto iera pronto. Già dela porta se sentiva un bon odorin.
Come primo, la mama ne ga dà una bona calda jota - minestra de fasoi con capuzi garbi.-- Dopo gavevimo sarme con patate lesse e, chi voleva, anche capuzi con polenta e "ozvirchi".
Tuto i ga inafià con un bon rosso istrian. Così che, non molto dopo gaver magnà, el nono e el zio Pepi i cantava sotovoce "Cantime Rita", la "Rosamunda" e la "Mula de Parenzo", e mi un poco con lori.
El papá e el fio del zio i giogava a briscola, e i fazeva fora le fritole e i crostoli che iera in tavola. Mi go cercà de "salvar" qualche d'un.
Fin che la mama lavava i piati, la nona la ghe diseva le ricete ala zia Jane. La ghe diseva: "La sera prima ti meti moiar i fasoi, che noi sia duri. Per cusinar ti li devi meter in acqua calda perchè se no i te resta duri. Dopo ti ghe meti el "carré" suto de maial, orzo e che se cusini. Ocio de non meter i subioti, lori i se mete in pasta e fasoi e non con i capuzi. Dopo ti ghe meti el dado, un poco de patate in tochetini così che vegni più fiso, e i capuzi garbi. Quando i capuzi i xe fati, anche la jota xe fata.
Invece le sarme se fà così : ti ghe meti carne masinada, mista de caval o de manzo con quela de porco. Poi ti meti un poco de zivola, mi la ingialiso per non farla sentir tanto. Ti ghe meti prezemolo, ovo, risi e un bic' de sal o se no, un dado. Ti misci e ti involtizi in foia de capuzo garbo, che prima ti ga lavà perche se no le vien tropo salade, le sarme. Ti le stivi in padela, e ti le meti cusinar in tanto de acqua che le copri.Per darghe gusto,ti meti cusinar vicin un osso de persuto o un poco de carne de maial suto, ma se ti ga meso bastanza porcina nele sarme, nianche non ocore. Dopo ti ghe fa un bic' de disfrito con un poco de oio e farina, e un poco de salsa de pomodoro e ti fichi in acqua cinque minuti prima che xe fato".
La mama se ga sentà con lore, e la ghe ga dado la riceta per le fritole e per i crostoli. La riceta per le fritole xe : due giali de ovo e un ovo intiero, 30 deca de zucaro, un bicerin de rum, un bicerin de oio, 5 deca de lievito, mezo chilo de farina e un bic' de sal. Se pol ancora gratar la scorza de limon e meter anche le sizibe.El tuto se mete in una terina e se miscia. Quando el lievito se ga alzà, se pol agiunger anche un poco de late che le fritole sia più tenere.Se lascia una mez'ora che se faci. Intanto se pronta una tecia de due litri, se mete scaldar el oio e quando el xe caldo se buta col cuciar la pasta (che la xe liquida) che vegni una balina. Se deve star atenti che el fogo non sia tropo forte, che non le se brusi, ma che le sia bele dorade. Prima de servirle se le cosparge de zucaro a velo.
I crostoli invece, se li fa così : se prende 3 ovi, 3 cuciari de zucaro, 3 cuciari de vin bianco, 3 cuciari de grapa, 3 cuciari de rum e farina quanto che domanda. Tuto se miscia e se fa la pasta. Se la distira col matarel e se la taja a righe. De le righe se fà i fiocheti e se li mete friser in oio caldo. Però sempre ocio al oio.
E mi ghe giunto, che se li deve magnar solo fin che i xe caldi e i odora così ben, se no i perde metà del gusto.
El secondo giorno, el zio Pepi xe andá saludar certi sui amici e già i se prontava per partir. La nona ga fato per pranzo i gnochi col gulas scuro de caval e el suo "famoso" strudel de pomi.Mi e el papà dovevimo gratar i pomi. Dopo el papà xe scampà e mi me tocava anche ingialir la zivola per el gulas.
La nona la ga messo nel gulas la zivola ingialida, la carne e la la ga miscià per ben, che la ciapi gusto. Dopo la ghe ga messo un paio de carote tajade fin, un poco de salsa de pomodoro, un bic' de ciodi de garofano e una foia de lavrano. El gulas non saría sta cosí bon se la nona non lo gavesi lassá cusinar sul fogo lento "due ore" e mi ogni tanto dovevo misciar che nol se tachi.
Intanto la mama fazeva i gnochi. Prima la ga cusiná le patate bianche, vecie, in scorza. Perché se le xe rosse le xe bone per friser, le bianche le xe bone per cusinar. E se le cusina in scorza perché se no le beve tropa acqua. Dopo gaverghe cavá la scorza e scotá i diti, la ga messo le patate in "strucapatate" e la le ga strucá. La ga fato una picia montagna de patate con un buso in metá. Lá la ga messo un ovo, un bic' de sal e un poco de buro. Dopo la ga misciá tuto e fato la pasta. Dela pasta la ga fato una "loganiga" che la tajava in tochetini. Mi li rodolavo fra i diti facendo i gnochi. Quando se li buta in acqua per farli cusinar e quando i vien a gala, se li deve lassar un due minuti che i se faci. Li gavemo servidi caldi con el sugo del gulas e col parmigian gratá de suso.
Iera de lecarse i diti, ma el zio Pepi piangeva quando li gavemo messo in tavola.
Ancora fin che pranzavimo, se sentiva un bon odor de strudel de pomi. La nona ga fato la pasta fina, la la ga disteso sul tavolo col matarel. Dopo la ga cosparso la pasta con i pomi gratadi.De sú la ghe ga messo pan gratà, dopo i tocheti de buro qua e là, un bic' de canela dapertuto, sizibe, e poi la lo ga involtizà. Con una pena de colombo la lo ga unto con una miscela de ovo e late e la lo ga messo rostir.
Però dal zio Pepi ghe iera gia tardi e ghe partiva el treno, così che nol ga arivà magniar el strudel.
Tuti lo gavemo saludà e basà, e già el ne saludava dela machina del papá che lo portava in stazion, quando la nona xe aparsa col strudel involtizado in una straza neta in una man e la riceta per la zia Jane in quel altra.

El zio Pepi gaveva el soriso sula boca e i oci pieni de lagrime. Mi ero sicura che quel strudel ghe ga fato almeno un poco dimenticar la sua "eterna pena" de esser sempre stranier, come in Canada così a casa sua, a Fiume, e iero molto felice per questo.

Lui, in quel, el se ga girá, ghe ga mandá un baso ala "Tore" e el xe partí per la stazion. El teniva el strudel streto con sé -- perché el piato tradizional de casa nostra, non se lo magna col stomago, ma se lo gusta col cuor -- e noi che semo restá a guardarlo, ierimo tristi perché iera come se ne gavessi portá via un tocheto de Fiume.

Cosí la visita del zio Pepi me xe rimasta sempre in mente, e quando el ciama in telefono per dir "Quando faremo di novo un pranzeto nostrano ? " mi ben guardo dove la nona mete quel suo unto e bisunto quaderno con le ricete, per non dimenticarle mai.

MARTINA BARICEVIC' - Classe VI a
S.E.I. "Gelsi" - Fiume - Rijeka