Gente istriana

Mi go i oci velai
e un gropo dentro
ogni volta che penso
a la mia gente
de sempre sparpaiada per el mondo
per un giogo del destin,
la mia gente inocente,
col cuor de fioi,
le mani sempre in moto,
che per storie de politica
de amor o de miseria
ga dovudo far fagoto.
Mi go un dolor de dentro,
che nol passa,
co se se incontra
cussì, per caso,
in spiagia o visin la Serpentina
e se se domanda in tono disperado
coss' che xe de la Giovanina,
de Carlo o de Gigi
e po ti senti che la Giovana
riposa in un altro cimitero,
la ga strussià tuta la vita,
e la voleva propio vegnir,
'desso che la podeva, povera fia,
ma po' la ga stroncada
una bruta malatia,
e Carlo, in Australia
el xe andà a finir
e Gigi, chissà perché,
no el ga mai volù vegnir.

Dio, che tristessa
in te la contentessa
de quel rivederse solo per le ferie,
e quante storie dolorose drio,
de poveri cristi tormentadi!
Per orgolio, per la lingua o per ideal
chi se ga trovà de qua
e chi de là de la baricada,
ma tuti ga ale spale
una famiglia sbregada.
E che pianti!
La mama voleva andar via
ma voleva restar el marì
de la fia,
un fradel se sentiva talian,
un altro druso
e i se tegniva el muso,
Tizio gaveva l' amante che partiva,
cussì via anche lui,
perché se no el moriva.

E 'sti pici grandi drami
ga portà dolor e afani
che ancora se strassina in te i ani
e co se trovemo tuti insieme
se magnemo coi oci,
perché savemo,
che sia noi che semo restai
che quei che ga fato le valise,
se portemo dentro le stesse radise.

Una storia in una cità con tanti paroni

- Siora Berta mia -
la Rosa ghe diseva
- un romanso xe stada
la mia vita!
E co ghe penso!
Soto l' Italia
gavevo un maressialo
dela Bassa
ma bel, ma bel,
e con dò oci neri
che no ghe digo,
ma un giorno
el ga ciapà el trasferimento.
- Rosa - el me fa
- fiore del mio giardino -
perché el parlava ben,
- parto, arrivo
ti scrivo, ritorno
e ti sposo.-
E, siora Berta mia,
chi lo ga visto più!
Go pianto sì,
xe vero,
ma la vita continua
cussì che soto i Inglesi
go tacà a parlar
con un putel scozese
che al giovedì
ai Giardini
el sonava el pifero,
biondo, delicato,
qualcossa de bel!
- Rosy - el me fasseva,
io dare
io fare, io avere -
Dio, che bel parlar
propio de foresto!
Ma i xe andà via de colpo
che gnanche no savevo
e de novo iero sola,
povera disgrassiada.
Un romanso siora Berta,
la me credi.
Po nel quarantoto
me vegniva drio un uficial dei druzi,
me piaseva la montura,
la fasseva figura.
- Roza - el me diseva
ma con delicatessa,
e altro gnente
perché no'l saveva
una parola de talian.
El xe tornado in Lika
e chi ga avù ga avù
Un romanso, siora Berta,
e intanto i ani passa,
ma mi son una signora,
no go mai odià nissun.
Per fortuna no son sola,
go lori che me tendi,
la sa, son vecia e stanca,
eco, ghe li presento:
Gaetano, Freddy e Branka.