di
Arturo Caffieri
Saremo insieme tuti,
tuti veri fiumani,
e veci, grasi e suti
se daremo le mani.
Non ghe sarà altre raze
tuto sarà un color,
parleremo domace
come ne deta el cor.
Ricordemo i ani
quando fioi in Gomila
corevimo drio i cani,
a venti o trenta in fila.
Quando le sere scure
giogavimo ai soldai...
Le fughe e le paure
dei veci pulizai.
Ricorderemo i canti
che ne infiamava i cori,
ricorderemo i pianti,
le gelosie i amori.
Diremo soridenti,
el cor ne bate in sen!
Se semo senza denti,
pur se volemo ben.
E alegri baleremo,
tegnindose per man...
Contenti saltaremo
parlandose in fiuman.