di Gianna Mazzieri

(Poesia pubblicata a pag. 45 de "La TORE" (Edit) Nº 9 del 15 giugno 1999)

La zia Angio me contava
de vecie storie in Zitavecia,
de muli che le combinava
e babe pronte a criticar,

e co spasegio per le cali
me le ricordo queste storie;
profuma antico i veci muri,
ma i parla ancora in fiuman.

Piaza dele Erbe, e i Capucini,
el Domo santo, i Canapini,
la casa Garbas, l'Arco Roman
e la fontana del Mustacion.

Là de Gomila per la cucagna
viva San Vito, se beve e magna,
su per Calvario e per Tersato,
nel Barbacan e a Scoieto.

Te sento Fiume, Fiume ti son la più bela zità,
anche se Fiume, Fiume, ti cambi e ti cambiarà,
per sempre Fiume, Fiume, la sola che porterò in cor
per sempre Fiume, Fiume, mio amor.

Bate le ore de la Tore,
le vecie storie se ripete,
i muli speta le putele
per Corso i mira le più bele.

E se te vedo trascurada
coi muri che se tien apena,
mi torno subito ai ricordi,
ti resti bela, neta e fiera.

El sol xe calà
el Monte Magior lo ga scazià
e xe un mar che bate forte
le onde sul molo longo.

Fiume mia, ti dormi e sogna
e no gaver paura che
qua te son mi , per sempre mi.