(fin qua la vien, d'assai lontan)

di Basilio Zustovi

(Poesia scritta a Macerata - nel gennaio 1980)

La bora de regola
no ariva fin qua,
ma ogi sta mata
un strapo la fà.

La sento missiarse
su e zó pel camin,
sui vetri la sbati
fazendo tin tin.

In strada la gente
ai muri se grampa,
va cotole in aria,
capei che ve scampa,

e foie e paiuzze
che fa girotondo ;
insomma ve digo
xe un finimondo.

D'accordo, xe bora
rabiarse no val ;
ma come l' ariva
qua in meso al... Stival ?

El caso xe strano,
no posso capir ;
ma forsi la bora
qualcossa pol dir.

Averso el balcon,
e alora me par
che vegni un profumo
de pini, de mar....

E tuto se spiega,
la vien de lontan
sta bora per dirme
che xe San Bastian.

Xe 'l venti gennaio
de Albona una gloria
sta data chi pol
sgrafar da la storia ?

Xe festa, e alora
a messa se va ;
se bevi quel bon
el dolze se fà.

... Se in fondo po resta
un poco de amaro,
pazienza, sto giorno
a noi tanto caro,

con fede ne fazi
sperar nel doman ;
lassù sempre vigila,
su noi, San Bastian.