Mi me ricordo che el Mulo Ferruccio Kniffitz - quando che erimo insieme Istrutori al Colegio "Tommaseo" de Brindisi - ala matina, quando che el se faceva la barba col rasador, el usava sempre cantar 'sti tocchi de opera dela Boheme o dela Traviata e sempre el me dixeva che anca el suo Papà el usava lo stesso.

Anzi, che el se gaveva imparà cantar propio dal suo Papà, al qual ghe piazeva tanto quela aria della Sonambula" del Vincenzo Bellini, sizilian de Catania: "Prendi, l'anel ti dono".

E alora anca mi me son ricordà che el mio Papà quando che el se fazeva la barba - dopo de gaver gua' el suo rasador col manigo de osso su quel tocco de corame che se usava per guar i rasadori - el cantava sempre la "Gigia Valzer", che la sentivo sempre cantar ala ostaria dal "Spada" in Via Roma.

Ma chi era 'sta Gigia Valzer?

Lui me dixeva che lui la conosseva e che tante volte propio dal "Spada", lui ciamava un meso de vin bon e che insieme a essa i beveva e i ciacolava.

E mi che ero ancora muletto, mi ghe credevo.

La Gigia Valzer la deveva esser per i nostri Veci una specie de Lilì Marlen, quela che per el soldato tedesco de la seconda Guera Mondial ... "tute le sere là soto quel feral, lo stava a aspetar".

Ale nove in punto de sera, e de ogni sera, sonava 'ste radio (chi che le gaveva) e tuti i se commoveva sentindo sonar la Lilì Marlen, e el giorno dopo più valorosi e vitoriosi i Gnochi i andava incontro al nemico.

Ai nostri invece - che i era del Sibunoinzik Reghiment Infanteri e sopratuto del Corpo dela "specialità" dei Demoghela e dei Ribalton, e che ghe tremava le gambe - ghe bastava molto de meno e i sognava de scampar e sposarse de vivi con una Gigia Valzer qualsiasi ...

Infati, la canzon la dixeva:

"E quando passa el Regimento, le gambe mie tremar mi sento,
le gambe mie tremar mi fà;
la Gigia Valzer vorrei sposar:
Marciar mi batte il cor, si accende la fiamma del amor
quando vedo un militar scampar".

El mio Papà el me contava anca che i furlani dela Furlania i era anca lori nei Demoghela del Sibunoinzik e i gaveva contagiado el Regimento con el deto valoroso de lori: "Se i vien, scampim; se no, batim dur!" che tradotto in fiuman voleva dir che se i taliani i gaveria atacado, lori i ghe la gaveria dado a gambe, e che se no, i gaveria tegnudo le posizioni.

Ma el mio Papà col se fazeva la barba davanti del specio, el cantava anca quela che la dixeva:

"Quando che el mar fà la burasca, e che le onde le salta fora,
la Teresina la se inamora, de un bel giovine pescador".

E me ricordo ancora de una canzon molto vecia, che la era autentica poesia e che la fazeva così:

"Faremo dormi o dormi, fin che la Ronda passa;
tu sei la mia diletta, tu sei la traditora!
Bella, se vuoi venir, là nel più bel giardin;
noi parleremo d'amor, tra rose e gelsomin."

Era canzoni fiumane de ostaria, unichi loghi de ritrovo dei nostri Veci, indove che lori i andava de sera dopo del lavor per bever el bicier, giogar le carte o a biliardo; mentre era scrito "E' vietato il canto e il gioco della morra", ma lo stesso tuti i cantava anche de imbriaghi sbregadi e i giogava ala mora batendo i pugni sui tavoli che i tremava per i colpi: Do', Quattro, Sie, Tuta! e sempre ghe era intorno quei che i guardava e che i spetava el propio turno.

Sempre vedevo dal "Spada" un tocco de omo, invalido dela Granda Guera, che el gaveva le crozole de legno che le ghe serviva per metersele soto i scai perchè ghe mancava la gamba destra soto del zinocio: la braga de quela gamba la era come cusida e così pareva che lui el portassi le braghe brigess.

Ale diese de sera, quando che el fumo e el skagaz i era al massimo, i aventori dela ostaria i intonava quele alegre tipo "Son giovane e son bela; son nata de carneval" opur "Viva la Sala Diana, la xe fata per balar" o quela romantica:

"Che cosa importa a me, se non son bella;
mi gò l'amante mio, che fà il pittore.
Lui mi dipingerà come una stella"

Verso la mesanote, quando che el carigo dela vinazza el arivava al top, i cantava le più impegnade del tipo "Val più un bicier de dalmato, che l'amor mio che me tradisse" e i infieriva contro qualche amor che li gaveva respinti: "Va via de quà, bruta veciazza, che gnanca el porco nol te vol più" per concluder con el coro de "La Vergine dei Angeli, ci copra del suo manto".

E alora comossi ma carighi de vinazza i ciapava la strada de casa dove che la "bruta veciazza" li spetava per aiutarli a meterse in letto non senza prima una bela baruffa: "Imbriagon, non ti se vergogni de vegnir a 'sta ora; cossa dirà la gente che ne sente".

Ma lui el se sentiva la coscienza a posto perchè una dele sue canzoni la dixeva: "El xe in osteria che'l gioga le carte; quela xe l'arte che lui gà imparà".

(Articolo pubblicato per gentile concessione della rivista "El Fiuman" - Newport, Australia)