Critichemo sempre el Governo de Roma per quel che non gà fatto per i Profughi, ma pur qualcossa el gà fatto come presempio la equiparazion dei Profughi ai Reduci che così gavemo podudo fruir vantaggi intele assunzioni nei Enti pubblici, e poi le Leggi per le Case e ancora altro.

Ma el Capolavoro - anca in termini de tempo per la urgenza del problema - xe stada la soluzion trovada per i studenti profughi che rimpatriando non i gaveria avudo la possibilità de continuar e concluder le scole.

La Accademia Naval de Livorno dal 1943 la era stada spostada provvisoriamente a Venezia e poi a Brindisi e così finida la guerra, i Cadetti i gà fatto ritorno intela sede original lassando libero un Collegio novo e de prima classe.

Chissà quanti Enti che i gaveria voludo metter le mani su quella splendida struttura della GIL ex Gioventù Italiana del Littorio, ma la Assistenza Postbellica la gà decidesto de far propie le proposte del Comitato Giuliano de Roma (grando lavor del compianto Padre Rocchi) e così tutti i Muli i gà trovado un banco de scola indove finir le scole inferiori e superiori, invece che perderse nei ozi dei Campi Profughi.

250 era i posti e 250 le rette per la boba, ma la forza dei Allievi la xe arrivada ai 330 - perchè el Direttor Pietro Troili (Liceo Scientifico de Fiume) nol se la sentiva de mandar via i Muli in esubero - e per questo era "abbastanza" fame per tutti.

Così a Brindisi se gà formada una sana e preparada intellighenzia de Mularia con un tocco de carta in scarsella che se gà podudo costruir un avvenir.

Comandanti de nave e ingrassadori (Direttori de macchina), dottori, ragionieri, generali e anca ambassadori e magistrati: questi i frutti del "Tommaseo" che el Governo de allora el gà sapudo far maturar.

La famiglia lontana, la terra persa, la fame, el impegno a far tutti - grandi e picci - el nostro dover de studenti, xe stadi i ingredienti che ne gà unido come che se fossimo tutti fradei.

E i picci i copiava de noi grandi el comportamento, e la educazion dei nostri Padri la ne era de guida a tutti.

Nei tempi liberi della ricreazion - sia prima che dopo magnar - se riunivimo e cantavimo in coro le canzoni delle nostre terre e quelle anca imparade dai nostri Veci, e quando che andavimo in libera uscita a Brindisi, in divisa e in fila per sei, i brindisini i ne guardava con ammirazion e affetto.

Anca se el militarismo el stava passando de moda e non usava più marciar, el nostro concetto de ordine nol podeva accetar de camminar come strazzoni e allora se cantava - per tegnir el passo - le tedesche della Wehrmacht oppur le nostre domace come "Mudande de seta, fodrade de lamarin", la "Gigia Valzer", "Quella sera sotto al pergolato" o "La Santa Caterina" e altre ancora.

In testa stava i Muli più grandi per finir con i Muletti, che i se deveva sforzar a tegnir el passo dei grandi con el petto ben in fora.

Alla periferia de Brindisi, la gente stava sentada fora della porta delle case e i se ciamava un col altro per goderse el spettacolo de "li Giuliani che passavano cantando".

A Brindisi xe passadi oltre 600 Muli, che i se gà riunido nella "Libera Unione Muli del Tommaseo", costituida a seguito del I Raduno che el se gà svolto a Lazise sul Garda nel 1986.

El XVIII Raduno se svolgerà dal 17 al 22 Settembre a Colle Isarco (Gossensass) a 7 km. dal Brennero in un Soggiorno Montano dove disponemo de ottima sistemazione logistica tutta interna ed esclusiva per noi con mensa, biblioteca, bar, sale de lettura e teatro per la Assemblea annuale.

Segretario General della Union xe el Nini (Carmine) Piccolo de Fiume, che el vive a Bergamo.

Gavemo un Bollettin trimestral che se ciama "La Zanzara", nato nel 1945 al Liceo Scientifico de Fiume epurado dai Titini, e el Zanzarier (Direttore Responsabile) xe el Mario Cervino de Fiume che el sta a Livorno.

Normalmente i Muli presenti ai Raduni i se conta tra i 80 e 90, e i Parenti e Amici i xe anca lori su un 80 presenze: in total un 170 de noi.

La Famiglia dei Muli passa le giornate in bella armonia e la se riunisse la sera dopozena in discoteca per far quattro salti (quei che i pol e che i gà voja) e poi per cantar tutto el nostro repertorio, zercando de sconderse le lagrime drio le lenti dei ociai.

E nel repertorio non manca le vecie canzoni croate (Ohi Marijanna; Na sveto ja nicoga neman; Tamo daleko; ecc.) arrivando perfino a cantar "Dove xe anda' el Bertulin" nelle traduzioni inglese e spagnolo, e qualche russa (Oci ciornia) in lingua original.

Nelle patriottiche non manca la fiumana "Oh Fiume, tu sei la più bella" e "Solo do' lagrime, una per ocio" dedicada a Pola, la "Zara mia", ma el canto uffizial dei Muli del Tommaseo xe "Oh Bella Dalmazia".

El Sabato mattina xe dedicado alla Assemblea, che la xe aperta a tutti e la scominzia con un fragoroso AccadueO (H2-O) dedicado ai Muli che ne gà lassado per portarse avanti.

Alla Domenica mattina se svolge la Santa Messa intela severa Ciesa barocca del Paese, offiziada dal nostro Cappellan Don Staver de Pola, con cori a due voci della intramontabile "Cuore dolcissimo" dedicado alla Vergine e Madre.

El Sabato sera Pranzo di Gala con i Muli e le Mule in granda gringola.

Alla Domenica mattina, dopo della Messa e della fotografia de gruppo in zentro del Paese, granda Marcia dei Muli in fila per sei come ai veci tempi delle uscite a Brindisi al canto del

"Chicche lavora, non gà mai niente,
xe mejo passeggiar!
Questi Morosi, tubercolosi, mandeli al Ospedal

Ragazze belle che noi vogliamo avere
per poterci a divertir ...
ma quando sarà quel giorno
che a casa potrem tornar."

Al Lunedi triste giornata de Addii spetando che passi altri 365 giorni per far riviver la nostra Gioventu' de Brindisi e sperando de esser presenti per zigar con forza un altro H2-O.

Al mio tavolo - oramai de molti anni - son in compagnia del Ferruccio Kniffitz che el stà a Ravenna e del Giulio e della Karin.

Non credo che el Giulio - in via de guarigion - el ghe la farà in tempo a refarse, ma noi ghe tegniremo el posto per el prossimo anno.

Rudi Decleva

Genova 25 agosto 2003