Dopo aver ciapà el diploma de maestra alla scuola Carducci de Trieste nel 1925 ( alora per diventar maestre a Trieste bisognava far tredici ani de scola  perché ghe iera ancora l’ordinamento austriaco, in Italia invezi, prima de la riforma Gentile, bastava undici ani, mia mama  la iera del 7 e la gaveva saltà una classe, nel venticinque quindi la gaveva diciotto ani).
Subito la ga fato un concorso, la lo ga vinto e i la ga mandada a insegnar a Vodizze ( attualmente Vodice), sul Carso. Alora no iera i mezzi de trasporto che xe desso, per rivar là la doveva cior el treno, po’ far do ore de strada sul mus o a piedi. Iera insomma un posto fora del mondo.
La scola gaveva due classi al piano terra e, al primo pian iera un picio appartamento per le maestre dove che mia mama xe andada a star e dove che iera zà un’altra maestra , la Vesna, una slava che la gaveva fato scole slovene, ma che la doveva insegnar in italian.
Mia mama la ga ciapà el posto de un vecio maesto sloveno che el iera andà in pension, e la iera quindi la prima maestra italiana in quel paese.
Come la stragrande maggioranza dei triestini mia mama no saveva parlar  né sloveno né croato, salvo quele poche parole che se trova nel nostro dialeto, ma la gaveva compagnada là suo papà, mio nono, che el iera un commerciante e che de lingue el ghe ne conosseva diverse, visto che le ghe serviva per i suoi commerci, più o meno tute quelle che i parlava ai tempi dell’impero, cussì lui el se ga messo a ciacolar  lori i ga pensà che anche mia mama conosessi la loro lingua.
“ Iè nascia” i diseva, i pensava che ela la parlassi solo italian perché cussì i ghe gaveva ordinà, che no la podessi parlar sloveno, altrimenti i la gavaria mandada via,  e i iera tutti coccoli con ela. Ma mia mama però in quel posto la se sentiva sola, co la Vesna no la se trovava e cussì, spinta de la disperazion, l’andava a parlar latin col prete!
A Vodizze  abitava i Cicci, popolazione di origine romena, le donne portava le cotole plissettade, che naturalmente le se fazeva in casa. Iera gente povera, molti de lori i iera  carbonai e i viveva quasi sempre nei boschi, ma i saveva anche divertirse, e, durante le feste, ghe piaseva sai balar; anche el prete balava coi altri, co le cotole che ghe svolava al vento. La natura iera bellissima, mia mama co la bona stagion ghe piaseva caminar pei boschi dove che la trovava, cussì la diseva “tappeti de fragole”.
Mia mama la gaveva  assai un bel ricordo de Vodizze, presto la ga imparà la lingua e la xe diventada amica de la fia del paron de l’unica osteria del paese, una putela de diciasette anni che la se ciamava Slavizza. Quando che no la gaveva scola la andava de ela, le se sentava in cusina e, col ricamo in man ( a quei tempi le giovini le se ricamava el corredo), le ciacolava.
Un pomeriggio, mentre che  le due putele le stava tranquillamente sentade vizin el fogo, se ga verto la porta de comunicazion co l’osteria e xe entrà un giovinoto; mia mama la ga alzà i oci del ricamo e  la ga  visto che  l’espression de la sua amica la iera cambiada, che la gaveva paura. Sto omo, che el iera el brigante Kolaric, el xe entrà e vardando Slavizza el ga dito:
“Perché no te me presenti la signorina maestra?”
“ Mi non te conosso” ghe ga risposto ela
E lu:” Come no te me conossi, mi son tuo cugin!”
“ Mi no go un brigante per cugin!”
A sta risposta el Kolaric ga tirà fora la pistola e le due putele le xe scampade fora e via de corsa  fin la scola, là le se gà serà in camera de mia mama e le ga messo un armadio davanti a la porta.
Le xe stade tuta la sera là piene de paura, ma el brigante no se ga visto.
Kolaric iera un dei ultimi briganti gentiluomini e el gaveva la fama de aver vendù l’anima al diavolo. Una volta infatti i carabinieri i lo gaveva ciapà e , sicome che lui el pareva ferì gravemente, i  lo stava trasportando su una barela. Quando che el xe passà vizin del bosco, lui se ga ciapà su e el xe scampà.
Un’altra volta el  iera andà assieme a quei de la sua banda a passar la notte in casa de una vecieta che la stava sola un poco fora del paese. I briganti i se ga sentà in cusina e i ghe ga dito a la parona de casa se la ghe fazeva el café. La povera vecia la ghe lo ga fato  po’, piena de paura, la xe andada in camera sua dove che no la ga podesto dormir tuta la note. Figurarse come se pol dormir coi briganti in casa! La mattina la banda  la xe andada via. Dopo un poco de tempo la vecieta la ga sentì bater a la porta. Iera un muleto che ghe portava un paccheto de cafè. Kolaric  gaveva voludo sdebitarse.
Quela volta all’osteria de la Slavizza xe sta la prima volta che mia mama la ga visto el bandito.
L’anno dopo mia mare la  ga avudo el posto a Cave Auremiane (adesso se ciama Vremski-Britof)e là la gà conossù la sua nuova collega, la Giulietta ,una triestita, che la xe diventada sua amica, un’amicizia che la xe durada tuta la vita. A Cave Aureniane mia mama la xe andada star a pension de la famiglia de Cleva, che una volta la iera stada la parona del paese. I de Cleva viveva in una grande casa e sora el porton d’ingresso iera scolpìda la testa de un omo con un ocio solo che el iera el fondator de la casata, in tempi antichi loro i iera stadi i feudatari del paese e el nono, in gioventù el gaveva avù diritto al “ ius primae noctis”. I iera nobili, ma sporchi, la parona de casa no la se gaveva mai lavà i cavei in tuta la sua vita, solo, ogni tanto, la se li netava col petrolio, la gaveva una bellissima e grossa treccia nera, pol esser che lavarse tanto come che femo noi non fazzi po’ troppo ben.
Comunque mia mare ricordava sempre con rimpianto quei minestroni che la magnava in casa de Cleva co dentro la carne de maiale affumicata.
Quando che la xe stata a Cave Auremiane mia mama la ga avuto occasion de riveder el bandito Kolaric.
Ela e la sua amica Giulietta le iera andade a piedi in un paese vizin a trovar una collega, le iera d’accordo con l’omo che portava el carro del carbon che le gavarie riportade a casa.
Vien la sera e l’omo del carbon no vien ciorle, alora lore le va zercarlo all’osteria.
Le entra dentro e i lo trova imbriago:
“ O vignì, vignì, signorine maestre!”
Lore le se volta per andar fora, quando che le senti una voce  che ghe disi gentilmente:
“ Signorine maestre volete che vi accompagni io a casa?”
Iera el brigante Kolaric. Naturalmente le ghe ga riposto:” No, grazie”  e po’ le se corse via piene de spavento.
No ghe restava che tornar a piedi, la strada  fazeva zig e zag, ma lore le cioleva le scorciatoie. A un certo punto le ga pensà:
“ Ma se el brigante decidi de seguirne e magari el ciol la bicicletta ( a quell’epoca i briganti gaveva la bicicletta) e noi quando che rivemo sulla strada se lo trovemo là?”
Allora le ga deciso de armarse, le ga verto el fazzoletto le ghe ga messo dentro un sasso, e cussì con l’arma in pugno, le xe tornade a casa. Anche quela volta el brigante no le ga seguide.
Mia mare parlava sempre con rimpianto de quei tempi, anche perché iera i tempi de la sua gioventù, con quela gente la se gaveva trovà ben, anche perché che la iera triestina e quindi non troppo lontana de la loro mentalità. Ma la me diseva che spesso i maestri e i altri funzionari governativi i vigniva mandadi  in quei posti per punizion e che quindi no iera certo i elementi migliori e no i ne fazeva ben figurar di fronte a gente abituada all’onesta amministrazion austriaca.
“ Ghe gavemo voludo insegnar l’italian –diseva mia mare a conclusion dei sui racconti- saria sta meio insegnarghe a dir ben de noi in s'ciavo che farse di mal de noi in italian!”