Le s'cinche iera de tanti tipi, ogniduna col suo nome e col suo valor. Quela che valeva de meno iera la "piraia". La iera fata de argila, piturada de diversi colori. I colori se sconsumava sai presto, cussì che el suo color diventava maron. La piraia la valeva un solo un colpo. Dopo vigniva le "vetraie". Come che disi el nome, le iera de vetro e se le trovava in te le fiasche de pasareta. Ghe iera due tipi de vetraie, quela verde, che valeva 3 colpi e quela bianca, che la valeva 4 colpi. Dopo ancora vigniva la "sassaia". La iera fata de sasso e la valeva 6 colpi. Questa iera quela che se usava de più per giogar, perché la iera dura e no la se macava quando che la ciapava i colpi. Le s'cinche più bele iera le "americane." Le iera fate de vetro, con tanti colori e le valeva 7 o 8 colpi, secondo la beleza. Le iera però delicate e le se macava facilmente. La "marmaia", fata de marmo bianco, la iera sai rara e la valeva 12 colpi. Mi ghe ne gavevo solo una. El valor più alto lo gaveva i "bisini"che iera come le "americane" ma più grandi. No se li usava per giogar ma solo per far scambi. El giogo gaveva le sue regole che se doveva rispetar. El campo de giogo iera un toco de tera ben lissada con in mezo un buso che se ciamava "vaga". La "vaga" se la fazeva puntando per tera el taco dela scarpa e girandose intorno fina a che no iera fato el buso. Mi gavevo un per de scarpe che andava sai ben per far 'sti busi, perché mio papà me gaveva tacà i fereti in punta e sul taco per non sconsumar la siola. Fata la "vaga", se scominziava a giogar in due, in tre o anche de più. Chi che iera più svelto el diseva "ultimo" e el tirava per ultimo, che iera un vantaggio. Un altro diseva "pe", che voleva dir penultimo e el tirava prima del' ultimo. Chi che no diseva gnente, doveva meter zò la sua s'cinca per farse tirar dei altri. Se el diseva "pensa" , alora el podeva sconder un poco la s'cinca de drio de qualche saso, sempre che chi che doveva tirar no gavessi zà dito "gnente pensa". Se chi che doveva tirar diseva "neta" el podeva netar el percorso dela sua s'cinca, sempre che quel altro no gavessi zà dito "gnente neta" o "sporca". Come che vedè, bisognava rispetar una procedura con regole sai ben definide. Dopo questi "preliminari", chi che doveva tirar per primo el se meteva col mignolo dela man sul'orlo dela vaga e el tirava la sua s'cinca, zercando de colpir quela del'aversario. Iera diversi modi de tirar. Chi che no saveza giogar ben el tirava "a rusolo", cioè el sburtava la s'cinca con el dito police per farla rodolar, zercando de colpir quela del'aversario. Inveze, chi che iera bravo, el tirava "a sblock". Questo iera come un tiro balistico, a parabola, la s'cinca la pasava oltre i ostacoli e la colpiva quela del'aversario. Mi zercavo de tirar a sblock ma no sempre la s'cinca andava dove che miravo. Me ricordo che iera muli sai bravi a giogar che i girava per le campagnete, portandose via le s'cinche che i vinzeva. Qualchedun giogava anche per soldi ma noi no, perché no gavevimo mai un boro. Una volta xe vignù in te la nostra campagneta un mulo de Castagner, un certo Marieto. 'Sto mulo el gaveva un sacheto pien de s'cinche, bele, de tuti i tipi e colori. Mi me go fato gola e ghe go domandà de giogar, pensando de vinzer qualcheduna. Go tirà fora la mia "marmaia" per far bela figura e gavemo scominzià a giogar. Dopo i primi tiri, go subito capì che 'sto Marieto iera più bravo de mi ma, oramai, no podevo tirarme indrio. E, purtropo, colpo dopo colpo el xe rivà a 12 colpi e el me ga vinto la mia "marmaia". Me vigniva de pianzer ma go dovù darghela. "Debiti di gioco, debiti d'onore" xe el deto.