Co’ iero picio, dopo i Tedeschi e i Anglo-americani, a Pola xe rivada la “Jugoslavenska Armija”, l’armata jugoslava o, come che ghe disevimo noi, “i drusi”.

Iera tanti soldai in giro per la cità, tuti con la stela rossa sula bareta e, intanto che i marciava, i cantava “ Druze Tito, ljubicize bijela….” La gente ghe gaveva subito fato la rima “Druze Tito, dane pesse frito” e anche “Ljubicize bijela, dane la gamela”. Questo per far capir che el problema principal iera ancora la boba. Iera el razionamento con le tesere e se trovava sai poco de comprar. Quando che rivava la roba, bisognava far file enormi e no sempre se rivava ciapar. Le done le andava de matina presto in mercato e in giro per le boteghe per trovar qualcossa de far per pranzo o per zena. Quando che le vedeva una fila, le domandava “cossa i da?” “oio”, ghe rispondeva qualchedun o “farina” e alora le se meteva in fila anche lore. O, altre volte, se vigniva a saver che là, in quela bottega vizin del Ponte, iera rivadi , tanto per far un esempio, capuzi garbi. E alora, tute ‘ste done a corer con le borse e con le pignate per comprar e, quando che le rivava là, i capuzi iera zà finidi. Magnavimo pan nero, de quel che scricolava soto i denti. I diseva che iera farina che vigniva dela Turchia dove che iera deserto e che alora che ghe iera dentro sabia. Mio nono diseva inveze che la sabia ghe la meteva dentro lori per far pesar de più la farina. Insoma, no iera ben e la gente doveva zercar de rangiarse. Mia mama la cusiva e ne vigniva per casa ‘ste babe in braghe e con la bareta con la stela rossa, le “drugarize”, per farse far le “borse za zize”, cussì le ciamava lore i regipetti. Anche mio nono el cercava de iutar e el se gaveva messo a ingovernar spacher, quei che ogi ciamemo cucine economiche,per ciapar qualcossa. Questi spacher iera sai boni ma col tempo el calor ghe brusava el rivestimento interno e anche la lamiera. Mio nono, che el gaveva lavorà in cantier, el iera bravo de far ‘ste riparazioni. El fazeva el rivestimento completo del spacher coi matoni refratari e la malta de un cemento special che i ciamava “samot”. El riparava anche la lamiera metendoghe dei taconi de lamierin tacadi con i ribatini. Qualche volta, la gente no gaveva soldi per pagar e, alora, la dava in cambio qualcossa de magnar. Insoma se se rangiava. Cussì xe sucesso anche con un Crovato de nome Branko che el se gaveva messo con una baba de Pola che stava vizin de noi. El ne gaveva portà ‘sto spacher, vecio, sai mal ridoto de riparar e, un poco in italian, che lui gaveva imparà qualche parola, e un poco “po nasu”, che mio nono gaveva imparà de picio a San Piero, i se ga intendesto. Mio nono bel ghe ga ingovernà el spacher e lui, per paga, ne ga portà due bestie selvadighe. Iera due usei, ma grossi e senza piume. ‘Sto Branko ga dito che xe dindii selvadighi che lori i ciapa in tei sui boschi là in Lika. E perché che no i ga piume? Ghe ga domandà mio nono “Perché je uzel giovino” ga risposto Branko “ma sai bon, rosto su bronze, ezzelente!” Bon, ga dito mio nono, li faremo ingrassar e li magneremo per Pasqua. Mia mama no iera tanto convinta, ma istesso gavemo messo ‘ste bestie in una caponera in orto e gavemo scominzià a darghe de magnar. ‘Sti usei gaveva sempre fame e se no ghe se dava i zigava come mati, che la siora Tonina, che la stava là vizin, la gaveva anche protestà, che raza de bestie che tignimo in caponera. In casa no ne vanzava tanto de darghe ai usei e, alora, mi andavo col secio a cior vanzumi e anche lavature de piati de siora Maria, che la lavorava in mensa dei ferrovieri. Lori tuto i magnava e co’ andavo in caponera i iera cativi e i me becava. “Bisogna gaver pazienza” diseva mio nono “xe bestie selvadighe”. Bon, finalmente xe rivada la settimana prima de Pasqua e mio nono ga dito che ‘sti usei iera cressudi abbastanza, anche se i gaveva ancora poche piume, e li ga mazadi. Dopo li ga speladi e li ga messi a frolar per un pochi de giorni in cantina.. El giorno de Pasqua, la matina presto, el ga impizzà el fogo, e, quando che se ga fato bele bronze, el ghe ga messo sora ‘sti due usei, impiradi su de un fero che el fazeva girar su due cavateti, “allo spiedo”, insoma. Dopo un poco che i se rostiva, gavemo scominzià a sentir spuzza, come de freschin, ma mio nono ga dito subito che xe normale, che la selvaggina per forza spuzza de selvadigo e el xe andà avanti a rostir Ogni tanto el tastava ‘sti usei con el piron per veder se i iera fati ma i iera sempre duri. A mezzogiorno gavemo deciso che i doveva esser fati per forza, li gavemo cavai del fogo e messi in un grande piato per taiarli. Mio nono ga scominzià a taiar i tochi ma el fazeva sai fadiga. El ghe dava la colpa a ‘sti cortei, che noi taia mai, che bisogna guarli, ma ala fine, aiutandose anche col marsan , el ga rivà a taiar ‘ste bestie e mia mama ga portà in tavola. Gavemo scominzià a magnar ma fin del primo bocon se ga visto che ‘sta carne no iera bona, la saveva più de pesse che de carne ma de pesse marzo come. Se gavemo vardà in tei oci e gavemo tirà via la roba del piato. Mio nono ga provà a magnar ancora ma anche lui, dopo un poco, el ga lassà, con la scusa che iera carne dura e che lui no gaveva denti boni. La sera gavemo provà a darghe ‘sta carne al can, che el gaveva sempre fame e el magnava de tuto ma gnanche el can no ga volesto magnar e cussì gavemo butà tuto in scovaze.

El giorno dopo, mio nono xe andà del vecio Ive, che iera caciador e el conosceva tute le bestie selvadighe, e el ghe ga portà de veder qualche piuma che ‘sti usei per saver che bestie che iera. El vecio Ive ga vardà ‘ste piume e el ghe ga dito “Giovanni, ma queste xe piume de cucal giovine, no xe bon de magnar, i ovi sì, quei xe boni e se pol magnarli in fritaia coi sparisi, co’ xe stagion, ma no la carne, la ga tropo de freschin e de pesse”. Mio nono xe restà de sasso, el xe vignù drito a casa e el ga dito: “Anche questi i ne ga ciavà”.